هل انا عبيط؟؟

انا الانسان امري عجيب  

هل انا عبيط ام ادعي العبط وقله العقل وادعي ايضا انني من الجاهلين

ولكني متيقن انني لست جاهل ولا عبيط ومتيقن انني امرض احيانا 

ومجرد نزله برد بسيطه تجعلني اعرف انني ضعيف جدا ووقتها لا ينفعني 

مالي ولا جاهي ولا سلطاني 

وفي ذروه الحمي والمرض اجدني اجزع اليه راجيا ان يشفيني ويعافيني

واعاهده انني لن اغفل ابدا عن ذكره وشكره دوما علي نعمه الصحه

ولكن بمجرد ان اشعر ببعض من العافيه اجدني مره اخري 

ادعيت الجهل والعبط والقيت بعقلي وعلمي في مستنقع الحياه الذي

لا بعطينا الفرصه للحظه ان نتذكر 

بل يعطينا الحجه ان نظل جاهلين غافلين بارادتنا ونتمتم  قائلين 

هي دي الحياه لازم نتعب ونكافح علشان الاجيال اللي جايه

الو          ايوه      مين  

البقيه في حياتك           مين    يا راجل   مش ممكن  

دا  كان سهران معانا امبارح وكان مزاجه عنب

 بلاش هزار يا عم  ده عمره ما تعب ولا راح لدكتور

كمان  يعني الحكايه كلها ممكن تخلص كده في ثانيه وبدون اي مقدمات 

طيب وبعدين 

يعني الشقه الكبيره اللي بالشيء الفلاني دي ملهاش لازمه ودي مجرد استراحه قصيره بين

الشوطين  يا حلاوه  

طيب نشوف فين بقي المستقر الاخير ونروح نهيئه بس ده مش بيتفرش 

طيب والعربيه اللي عمال اتفشخر بيها دي كمان ملهاش لازمه  

طيب يعني انا عبيط بجد ومش بيتهيالي 

ايوه طبعا عبيط لما كنت بازعل واحرق في دمي علشان الفلوس 

لما اتهبلت واتخانقت مع اخواتي علشان الميراث

متهيالي كده انا اتاكدت اني عبيط 

الاحداث والمواقف كلها اللي مرت في حياتي تؤكد ذلك

لما سمحت لنفسي انافق واداهن علشان المصلحه تمشي كنت عبيط

لما ضغط علي نفسي وقلت علشان ما نعلا ونعلا ونعلا 

 لازم نطاطي نطاطي

طيب تفتكر انك هاتبطل العبط ده ولا خلاص انت ادمنت العبط والاستهبال؟؟

بصراحه مش عارف  

بس انا متاكد برضه اني بكون سعيد ومبسوط اوي وانا مش عبيط 

لاني وقتها بكون بشكره كتير واذكره كتير واعرف قدري ومقامي و

مدي ضعفي وقله حيلتي وحاجتي الدائمه لفضله وهداه واعانته لي علي حسن

عبادته وطاعته 

اللهم اختم بالباقيات الصالحات اعمالنا وتوفنا مؤمنين موحدين

بدون عنوان

مش عايز بكره يفوت وانا لسه بموت والليل عمال يجرح

والوحده تزيد النار وتزيدني مرار والحزن يبات يصبح

وما بين كده او كده مش مرتاح انا

خليني باه كده يمكن الهنا  مداري في صبري عليك

طبعا دي اغنيه منير الجميله

لكن مش عارف ليه مسيطر عليه احساس

شايف ان الكلمات دي 

معبره عنه اوي بشكل يفوق

اي وصف ممكن اكتبه

نفسي اتعلم

                                                                            محتاجين نتعلم

ببساطه كده

مفيش عزه من غير علم

مفيش نور من غير علم

مفيش كرامه من غير علم

مفيش حد ادني من الحياه  من غير علم

حتي لو فيه فقر مدقع

 العلم بيخلينا ازاي نعرف نتاقلم ونعيش حياه كريمه

ايوه لما نتعلم ان الفقر ملوش علاقه بالقذاره

ساعتها ممكن نكون فقراء لكن بني ادمين متحضرين

حتي كيفيه اختلافنا في وجهات النظر 

برضه محتاجه علم

ايوه محتاجين نتعلم ازاي نتكلم

محتاجين نتعلم ازاي نسمع اللي بيتكلم 

محتاجين نتعلم ان نجاح واحد مننا هو نجاح لينا كلنا

محتاجين نتعلم ازاي ننزع الحقد والغيره من قلوبنا

محتاجين اوي اوي نتعلم معني كلمه حب 

رب الاسره محتاج يتعلم ازاي يحب زوجته وابنه وبنته

حتي الام اه والله حتي الام محتاجه تتعلم ازاي تحب الابن والبنت

والاهم انها تتعلم امتي تظهر حبها وامتي تخبيه

العلم ثم العلم ثم العلم

يكفينا دليلا وبرهانا ان اول ما انزل علي 

معلمنا ونبينا صلي الله عليه وسلم

هي اقرأ

هل انت منافق

فجاه كده ومن غير ترتيب سالت نفسي هو ليه احنا كمصريين نمتلك كل هذه الموهبه 

في كل اشكال وفنون النفاق؟؟

وبرضه سالت نفسي هو ليه احنا بنخاف اوي كده علي لقمه العيش لدرجه الاذلال؟؟

بجد انا معنديش اجابه شافيه  

لكن انا متاكد اننا رواد النفاق بالعالم اجمع واننا تفوقنا ووصلنا لمكانه في فنون والاعيب 

النفاق   لا يمكن لاي شعب باي حال من الاحوال ان يقترب من منزلتنا العظيمه 

في فنون النفاق

واسمحوا لي ان نتسائل جميعا ونسال انفسنا هل نحن منافقون ؟؟

ولماذا ننافق ونحن نعلم اننا حتما ميتون ومفارقون لكل من في الدنيا؟؟

وهل هناك نفاق ابيض زي الكدب الابيض؟؟

ام انه افه وبعض من اعراف وتقاليد سيئه لابد من اجتثاثها تماما 

دمتم بكل العقل والحكمه

هل فعلا المسلمون مفتري عليهم؟؟

 لا يخلو اي حوار بين اي شخصين مهما اختلفت مستوياتهم في الثقافه والعلم من جمله ان الاسلام  دائما يتعرض للمؤامرات  والاساءه 

وكل من هب ودب عمال يسيء للاسلام وطبعا لازم شويه بهارات من السباب في المسلمون ايضا

طيب اعتقد ان هذا التقديم لا يمكن لاحد انكاره

جميل خالص ليه بقي عمري ما شفت اي اتنين من اللي دايما عندهم غيره وحب ويتمنون ان يموتوا في سبيل دينهم العظيم

عمري ما شفت حد منهم فكر يسال نفسه هو ليه احنا ملطشه للي يسوي واللي مايسواش؟؟؟

وليه كمان عمرنا ما طلع من وسطنا واحد بس عنده شويه شجاعه ويقول لينا  اد ايه احنا بقينا وحشين اوي وضعاف اوي

وبالتالي بقينا ملطشه وكما جاء بالحديث النبوي في ما معناه اصبحنا كالفريسه التي تتكاثر عليها الوحوش لالتهامها

وللاسف ونحن كثره ولكن كما ذكر نبينا العظيم كغثاء السيل وللي مش فاهم المعني حاجه كده زي الفقاقيع تتكون اعلي المياه

برضه وبعدين كل اللي فات ده مش جديد كلنا عارفين وعايشين والحياه بتمر وخلاص

واحنا مش هانغير الكون

ايه اللي انا عايز اوصله  واتمني انه يوصل لكل المسلمين ؟؟

ان نعترف اننا الان اسوأ مسلمين ظهروا علي الرض منذ قدوم الاسلام

ولو رجعتوا للتاريخ الاسلامي لن تجدوا هوان وضعف اصاب الاسلام مثل هذه الايام

هات من الاخر

حاضر يا معلم 

لو كلنا اقتنعنا وفهمنا كويس اننا بهذا السؤ اكيد هتكون دي اول خطوه علشان نعالج امراض كتيره وخبيثه 

تاصلت في المجتمع الاسلامي وحدث ولا حرج

من اول النفاق والمحسوبيه والغش والسرقه وتاويل الحرام والحلال عل اهوائنا ونهايه بعدم قدرتنا علي الاقتناع ممدي الهوان والضعف الذي تملكنا لدرجه اننا تعايشنا معه وكانه اصبح من المسلمات

وانا اذا اراد الله لي ان اكمل ساحاول في كل مره اكتب فيها ان اركز علي كل مرض من امراضنا المستعصيه علي حده

والله هو المستعان